सुर्खेतको गुटु स्वास्थ्यचौकी १६ वर्षदेखि अलपत्र अवस्थामा रहे पनि चुनावी एजेण्डामा समेत प्राथमिकता पाउन सकेको छैन। २०६६ सालमा निर्माण सुरु गरिएको सुविधासम्पन्न भवन अझै अलपत्र अवस्थामा रहे पनि पछिल्ला निर्वाचनहरूमा यसको विषय ठोस रूपमा उठान हुन सकेको छैन।
तत्कालीन गुटु गाविसअन्तर्गत प्रमुख स्वास्थ्य संस्थाका रूपमा रहेको स्वास्थ्यचौकीको भवन एक वर्षमै सम्पन्न गर्ने लक्ष्यसहित मैनाचुली/सुरुची जेभी ले साढे १४ करोड रुपैयाँमा ठेक्का सम्झौता गरेको थियो। तर निर्माणमा कमसल सामग्री प्रयोग भएको भन्दै स्थानीयवासीले अख्तियार दुरुपयोग अनुसन्धान आयोग मा उजुरी दिएपछि काम रोकिएको थियो।
निर्माण अलपत्र परेपछि चौकुने गाउँपालिका को केन्द्रमा रहेको स्वास्थ्यचौकी अहिले जीर्ण भवनबाटै सञ्चालन भइरहेको छ। बिरामीको चाप बढ्दो रहे पनि पर्याप्त भौतिक पूर्वाधार नहुँदा सेवा प्रवाह प्रभावित बनेको स्थानीयको गुनासो छ।
भवन निर्माण सम्पन्न नहुँदै साविक सहरी विकास तथा भवन डिभिजन कार्यालयले भुक्तानी दिएको आधारमा अख्तियारले तत्कालीन कार्यालय प्रमुख, लेखापाल र निर्माण कम्पनीविरुद्ध विशेष अदालत मा मुद्दा दायर गरेको छ।
उक्त मुद्दा हाल सर्वोच्च अदालत मा विचाराधीन रहेकाले अन्तिम निर्णय नआएसम्म निर्माण कार्य अघि बढ्न नसक्ने सम्बन्धित कार्यालयले जनाएको छ।
स्थानीय तहदेखि प्रदेश र संघीय सरकारसम्म पटक-पटक ध्यानाकर्षण गराइए पनि स्वास्थ्यजस्तो संवेदनशील क्षेत्रको यो अधूरो संरचना चुनावी बहस र एजेण्डामा समेत समेटिन नसक्दा स्थानीय बासिन्दा निराश बनेका छन्।
प्रतिक्रिया दिनुहोस्