विकास र सुशासनलाई प्राथमिकता दिँदै एमाले हुम्लाको प्रतिबद्धता–पत्र सार्वजनिक

नेपाल कम्युनिष्ट पार्टी (एमाले) हुम्लाले प्रतिनिधिसभा निर्वाचन २०८२ का लागि विकास, सुशासन र समृद्धिलाई मुख्य एजेन्डा बनाएर प्रतिबद्धता–पत्र सार्वजनिक गरेको छ। ‘आगामी पाँच वर्ष, एमाले हुम्लाले गर्छ’ लगायतका नारासहित प्रतिबद्धता–पत्र सार्वजनिक गरेको छ।

प्रतिबद्धता–पत्रमा हुम्लाको भौगोलिक विकटता र विकासमा पछाडि परेको अवस्थालाई ध्यानमा राखिएको उल्लेख छ। सडक, यातायात, बिजुली, शिक्षा, स्वास्थ्य, रोजगारी, सञ्चार र पर्यटन क्षेत्रको विकासमार्फत नागरिकको जीवनस्तर सुधार गर्ने लक्ष्य एमालेले लिएको जनाएको छ।

एमालेले कर्णाली करिडोरको स्तरोन्नति, सिमकोटदेखि गाउँगाउँसम्म सडक विस्तार, हवाई र स्थल यातायातलाई सहज र सुरक्षित बनाउने योजना अघि सारेको छ। साथै जिल्लामा विद्युत् उत्पादन र प्रसारण लाइन विस्तार गरी ‘विधुतिकरण सहित उज्यालो हुम्ला’ बनाउने प्रतिबद्धता जनाएको छ।

शिक्षा क्षेत्रमा गुणस्तरीय विद्यालय र प्राविधिक शिक्षाको पहुँच बढाइने, युवालाई सीपमूलक तालिम दिएर रोजगारी सिर्जना गरिने उल्लेख छ। स्वास्थ्य क्षेत्रमा आधारभूतदेखि विशेषज्ञ सेवासम्म जिल्लामै उपलब्ध गराउने र स्वास्थ्य संस्थालाई बलियो बनाउने योजना समेटिएको छ।

कृषि, पशुपालन, जडीबुटी र पर्यटनको विकासमार्फत स्थानीय आम्दानी बढाइने र आर्थिक गतिविधि विस्तार गरिने एमालेको भनाइ छ। साथै सुशासन, पारदर्शिता र जनउत्तरदायी शासन प्रणालीमार्फत हुम्लालाई समृद्ध बनाउने प्रतिबद्धता पार्टीले जनाएको छ। प्रतिबद्धता–पत्रमा उल्लेखित कार्यक्रम कार्यान्वयनका लागि जनताको साथ आवश्यक रहेको भन्दै सूर्य चिन्हमा मतदान गर्न एमाले हुम्लाले मतदातासँग अपिल गरेको छ।