दसैँ अवधिमा अन्नपूर्ण चक्रीय पदमार्गमा विदेशी पर्यटकको आगमन उल्लेख्य रूपमा बढेको छ। यस वर्ष घटस्थापनादेखि कोजाग्रत पूर्णिमासम्म पाँच हजार ३८४ विदेशी पर्यटकले उक्त पदमार्गको भ्रमण गरेका छन्।
असोज २५ देखि कात्तिक ८ गतेसम्मको अवधिमा पाँच हजार ३८४ पर्यटक अन्नपूर्ण पदमार्गमा आएका हुन्। गत वर्ष सोही अवधिमा दुई हजार ७५७ पर्यटकले भ्रमण गरेका थिए। यस वर्ष गत वर्षको तुलनामा दुई हजार ६२७ पर्यटक बढी आएका छन्।
अन्नपूर्ण संरक्षण क्षेत्र आयोजना (एक्याप) को धारापानीस्थित पर्यटक जाँच तथा सूचना केन्द्रका प्रमुख भूपेन्द्र गुरुङका अनुसार पर्यटक आगमन बढ्नुका प्रमुख कारणमध्ये मनास्लु क्षेत्रको पदमार्गमा बाढीपहिरोले पुर्याएको क्षति पनि एक हो। मनास्लु पदमार्गमा बाढीपहिरोका कारण आवागमन प्रभावित भएपछि त्यहाँ जाने केही पर्यटक अन्नपूर्ण पदमार्गतर्फ आएका उनले बताए।
यस वर्ष मौसम अनुकूल रहनु र पछिल्लो समय मानिसमा घुमफिर गर्ने संस्कृति बढ्दै जानुले पनि पर्यटक आगमनमा वृद्धि भएको गुरुङको भनाइ छ।
केन्द्रको तथ्याङ्कअनुसार यस वर्ष अन्नपूर्ण पदमार्गमा आएका पर्यटकमध्ये तीन हजार २८८ पुरुष, दुई हजार ९४ महिला र अन्य दुई जना छन्। त्यस्तै, सार्क राष्ट्रबाट ६०९ र गैरसार्क राष्ट्रबाट चार हजार ७७५ पर्यटक आएका छन्।
देशगत रूपमा सबैभन्दा बढी भारतबाट ६०६ पर्यटक आएका छन्। त्यस्तै, जर्मनीबाट ४३८, इजरायलबाट ४१८, फ्रान्सबाट ३६४ र संयुक्त राज्य अमेरिकाबाट ३५२ पर्यटकले अन्नपूर्ण पदमार्गको भ्रमण गरेका छन्।
लमजुङको बेँसीसहरबाट सुरु हुने अन्नपूर्ण चक्रीय पदमार्ग मनाङ हुँदै थोराङ्ला भञ्ज्याङ पार गरेर मुस्ताङसम्म पुग्छ। हिमाली दृश्य, प्राकृतिक सौन्दर्य, परम्परागत बस्ती र स्थानीय संस्कृतिको अवलोकन गर्न पाइने भएकाले यो पदमार्ग विदेशी पर्यटकमाझ लोकप्रिय मानिन्छ।
