जिल्लाको ४ औं पूर्णखोप सुनिश्चितता नरहरिनाथ पालिका घोषणा

कालिकोट । जिल्लाकाे नरहरिनाथ गाउँपालिकालाई पूर्णखोप सुनिश्चितता घोषणा गरिएको छ । १६ देखि ५९ महिनासम्म गाउँपालिकाभित्र रहेका बालबालिकाले पूर्ण खोप पाएको सुनिश्चितता भए पछि सो गाउँपालिकालाई पूर्णखोप सुनिश्चितता घोषणा गरिएको हो ।

उक्त घोषणा हुनेमा जिल्लाको चौथो पालिकाका रुपमा रहेको छ।गाउँपालिका भित्रका ९ वटा वडाहरुका बालबालिकाहरूले चालु वर्षमा हालसम्म सबैले पूर्ण खोप पाएको र अगामी दिनमा पनि दिगोपना कायम राख्ने प्रतिबद्धता जनाउँदै पूर्णखोप सुनिश्चित दिगोपना गाउँपालिकाको रूपमा घोषणा गरिएको हो ।

गाउँपालिकामा १५ महिनाभन्दा मुनिका बालबालिकाहरूले नियमित खोप लगाइरहेको र १६ देखि ५९ महिना भित्रका बालबालिकाले पनि पूरा खोप पाइसकेको स्वास्थ्य शाखा प्रमुख मान बहादुर सहकारीले बताए ।

‘पूर्णखोप सुरक्षित भविष्य’ भन्ने मूल नारासहित एक समारोहबिच नरहरिनाथ गाउँपालिकालाई पूर्णखोप सुनिश्चितता तथा दिगोपना पालिकाको रूपमा घोषणा गरिएको हो । राष्ट्रिय खोप तालिकाअनुसार तोकिएका उमेर समूहका बालबालिकाहरुले सबै खोपको मात्रा पूरा गरेका थिए ।

खोप निर्देशिका अनुसार आवश्यक सबै प्रक्रियाहरू पूरा गरेर गाउँपालिकालाई पूर्णखोप सुनिश्चितता दिगोपना गाउँपालिकाको रूपमा घोषणा गरिएको स्वास्थ्य प्रमुख सहकारीले बताए । बालबालिकाहरूले पोलियो, दादुरा, हेपाटाइटिस, जापानीज इन्सेफ्लाइटिस, रुबेला, झाडापखाला, टाइफाइडलगायत रोगहरूको विरुद्धमा पाउनुपर्ने विभिन्न १३ प्रकारका खोपको सबै मात्रा पूरा गरेको उनको भनाइ छ ।

गाउँपालिका अध्यक्ष नगेन्द्र बहादुर बिष्टले ‘स्थानीय स्रोतको उपयोग, स्वामित्व र सहभागिता, पूर्णखोप पालिका हाम्रो प्रतिबद्धता’ लेखिएको व्यानर वाचनसहित प्रतिबद्धता जनाउँदै आगामी दिनमा पनि गाउँपालिकालाई पूर्णखोप सुनिश्चिता कायम गराउने बताए । गाउँपालिका भित्रका सबै सात वटै वडालाई पूर्णखोप तथा सुनिश्चितता घोषणा गरिसकेपछि मात्रै गाउँपालिकालाई पनि घोषणा गरिएको उनको भनाइ छ ।

गाउँपालिकाका अध्यक्ष बिष्टको अध्यक्षता सञ्चालन भएको कार्यक्रममा प्रमुख अतिथि जिल्ला समन्वय समिति कालिकाेटका प्रमुख एवंम जिल्ला खाेप समन्वय समितिका संयाेजक धनजित शाही, समितिका उप-प्रमुख एवंम जिल्ला खाेप समन्वय समितिका सह-संयाेजक मिना रावत बिक, समिति सदस्य धनसरा बिष्ट, अतिथि जिल्ला पुर्ण खाेप समन्वय समति सदस्य कटक बहादुर महत लागायत सम्पूर्ण वडा अध्यक्ष, शाखा प्रमुख हरुकाे सक्रिय सहभागिता रहेकाे थियाे।