संघीय खानेपानी तथा ढल व्यवस्थापन आयोजना कार्यालय जुम्लाबाट सुर्खेत सार्ने निर्णयविरुद्ध जुम्लामा तालाबन्दी गरिएको छ।
खानेपानी मन्त्रालयको असार २५ गतेको परिपत्रअनुसार साउन १ देखि कार्यालय सुर्खेतबाट सञ्चालन हुने जानकारी पाएपछि बसेको सर्वपक्षीय बैठकले उक्त निर्णय तत्काल फिर्ता लिन सरकारलाई माग गरेको हो।
बैठकमा सहभागी सरोकारवाला, नागरिक समाज, युवाहरू र जनप्रतिनिधिहरूले कार्यालय सारिँदा घौलिगाड वृहत खानेपानी आयोजना लगायत २० बढी आयोजना प्रभावित हुने भन्दै विरोध जनाएका छन्।
उनीहरूले संघीयता र सकारात्मक विभेदको सिद्धान्त विपरीत सुर्खेत केन्द्रित नीति नआउन आग्रह गरेका छन्।
बैठकले निर्णय सच्याउन माग गर्दै जिल्ला प्रशासन कार्यालयमार्फत ज्ञापनपत्र बुझाउने र माग पूरा नभए चरणबद्ध आन्दोलन गर्ने चेतावनी समेत दिएका छन् ।
प्रकाशित मिति : २०८२ असार २९ गते आइतबार
